هو الواحد مفروض يعمل ايه لما يقابل أم شاب عنده 16 سنة ألجمتها الصدمة و واقفة في زاوية على رصيف المحطة مستنية جثة ابنها بعد ما لقت اسمه بالصدفة ع التلفزيون؟ مفروض يعمل ايه لما يلاقي أبوه جاي يجري عليها و يقوللها "كلموني في الشغل بيقولولي البقاء لله، هو الواد جراله حاجة؟" مفروض يعمل ايه لما يلاقي الأب بيطلب منه انه يتأكد له ممكن اسم أحمد يكون جه غلط و يطلع مصاب مش شهيد "أحمد أسامة صلاح الدين من فيصل .. ممكن تتأكديلي؟" و يلاقي عينيه فيها دموع مليانة أسى و أمل مش عايز يموت؟ مفروض يعمل ايه لما يتأكد ان الولد اسشهد بس مش قادر يواجه أهله الي لسة مقتنعين انه "ممكن يطلع اتصاب ان شاء الله"؟ يعمل ايه و هو واقف جنبهم بعد ما الخبر يتأكد و يلاقي الأم اختفت راحت تدور على ابنها في المحطة و الأب بيخبَّط بإيده على راسه و تسمع جوه صدره صوت أنين مكتوم بس بيصم الآذان؟ مفروض تعمل ايه لما يعجز لسانك عن نطق كلمة مواساة واحدة؟ تعمل ايه لما تلاقي عائلة كاملة جاية بتقول لهم "ماتخافوش ممكن يكون اتصاب بس لسة في بورسعيد، احنا برضه محمد ابننا لسه مانعرفش عنه حاجة بس ان شاء الله عايش"، و على ماتيحي تشاورلهم ان أحمد خلاص مات عشان مايتعبوش الراجل و مراته أكتر تلاقي ابنهم التاني بيجري عليهم و صوت صريخه بيرج المحطة و بيقوللهم "محمد راح.. اتأكدت انه راااااح" فتسقط أم محمد بين يديك و جسمها ينتفض؟ تعمل ايه لما طول ما انت واقف رجالة الألتراس واقفين يهتفوا و أول ما يتعبوا من الهتاف ياخدوا بعض بالأحضان و يجهشوا بالبكاء؟ هو الواحد مفروض يعمل ايه لما يحس ان البلد دي قبل الثورة و بعد الثورة مش جاية غير ع الغلابة؟ يعمل ايه لما رجله تبقى مش مطاوعاه انه يمشي يرَّوح في نهاية ليلة زي دي .. يعني ايه "ارجع ع البيت" و في ألف بيت النهارده خالي؟ يا محطة مصر .. يا نقطة اللقاء و الفراق .. امبارح كنتي نقطة فراق أبدي ما بين أهالي ملكومين و أطهر الأبناء .. و كنتي بين قلوب كتير اتوحدت ضد العسكر الخونة نقطة لقاء

انا اربعه من صاحبي ماتوا في المذبحه بتاعت بورسعيد اتنين منهم صحابي معايا في نفس الشارع ابهاتهم لما عرفوا اللي حصل نزلوا يجروا في الشارع زي المجانين و محدش كان عارف يعمل حاجه جرينا جبنا عربيه و استنناهم في محطه مصر رجعولنا في كفنهم انا واحد من الناس كنت هموت من الخضه لما يبقي واحد صحبك كان قاعد معاك و بيقولك تعالي معايا الماتش تقوله ابويا مش راضي و هو يروح هو و تلاته صحابك يرجعولك متكفنين في الاعلام اللي راحو علشان يشجعوا بيها حرااااااااااااااااااااام
حراااااااااااااااااااااام يرضي مين ده يرضي مين يا ناس انا خلاص تعبت من الكلام و الرغي في الحق اللي عمرو ما هيرجع الا لما احنا اللي نرجعه حراااااااااااااام هو ليه بقي موتنا كده عادي دول حته مكنوش رايحين يتظهروا ولا يعملوا اي حاجه كل غلطتهم انهم بيحبوا النادي الاهلي احنا انهارده هندفنهم و بكره هناخد عزاهم في شارع الاوبرا بعد صلاة المغرب و في الاخر احب اقول ان اللي حصل في صحابي ده بسبب انهم قالوا يسقط يسقط حكم العسكرفي ماتش المقاولين و وقفوا مع الثوار و طالبوا باسقاط حكم العسكر الرساله وصلت يا مشير احب ارد عليك و اقولك يــــــــقـــــــــــســـــط يـــــــــقــــــســـــط حــــــــكــــــــم الـــــــعــــــــــســـــــكــــــــــــــر

يا نجيب حقهم يا اموت زيهم اصل اللي مات ده مش ارجل مني في حاجه و انا هنزل ما اخواتي من الالتراس و هنعرف نجيب حقنا ازاي و هنعرف ندفع البورسعيديه التمن

قومى ياما البسى اسود بقيت عمرك حداد
مات اخويا ف الثورة وانا مت فى الاستاد
قلبولك قلبك الابيض .. اما بقى لونو سواد
قتلونى ياما .. وحسدونى على الاستشهاد
ولا عايزنى شهيد .. ولا سايبنى اعيش
... ... ... ... فابكى ومتسمعيش .. اللى قالو متعيطيش
... ولو هتسكتى هتسكتى ليه ؟
لما انزل بعلم فريقى وارجع متكفن بيه
تستنى ايه ؟
دا يبقى حرام لو مصرختيش
فابكى ومتسمعيش .. اللى قالو متعيطيش
ومتخافيش .. مش هيقولو عليكى ندابه
دى حتى كتب التاريخ كلها طلعت كدابه
قالو ان الهكسوس ماتو من سنين
طب واللى قتلونى دول يبقو مين؟
مش معقولة مصريين
وانا مش ذنبى انى كنت للكورة هاوى
وامشى مع فريقى ف اى مكان وغاوى
حتى لما يسافر بتمرمط عالقهاوى
قتلونى عشان مصرى ولا عشان اهلاوى