إزيك يا نهلة؟عاملة ايه؟
احكيلي يا نهلة ايه اللي حصل من ساعة ما سيبتينا ومشيتي
روحتي فين وقابلتي مين؟
قوليلي يا نهلة ..هي الجنة عاملة ازاي؟
اوصفيهالي شبر شبر
ايوة يا يا عم مقضياها انتي جنة وشهدا وملايكة وعيشة آخر هنا وسعادة
قبل ماتسيبيني بيوم مارضتيش تخلليني ادفع وعزمتيني ع الغدا والمفروض المرة اللي جاية عليا..ها إمتي بقي هشوفك وانا موافق المرادي كمان تعزميني تاني بس ممكن نعزم معانا سيدنا (محمد صلي الله عليه وسلم) وكمان الشهيد مصطفي الصاوي وخالد سعيد
بقولك ايه اعزمي الشهداء كلهم وعليا انا العزومة دي
يا بختك يا نهلة
ياتري بتقولوا ايه علينا
اوعووا تكونوا بتألشوا علينا
أنا عارف ان احنا مقصرين في حقكم وحق مصر بس صدقيني والله بنحاول نعمل اللي نقدر عليه
والله تعبنا اوي يا نهلة من بعدك
لكن والله ما خنا العهد ابدا
بنحاول نحقق اللي حلمنا بيه كلنا
بنحاول نخللي مصر نضيفة من اللي افسدوها
ادعيلنا يا نهلة وخللي كل اللي معاكي يدعولنا محتاجينلكم اوي معانا
وما تقلقيش انا عملت حسابي في "ورق العنب " اللي بتحبيه وهجيلك بحلة مش هتقدري تخلصيها
مش هقولك مع السلامة يا نهلة
ولكن الي لقاء قريب جدا ....بإذن الله
ليست هناك تعليقات:
إرسال تعليق